დაგვიკავშირდით: (+995) 599 040 999

ფერწერული ნამუშევრისთვის ჩარჩო, ისეთივე მნიშვნელოვანი და ზედმიწევნით შესარჩევია, როგორც თავად ნამუშევარი. ნახატისთვის ჩარჩოს შერჩევისას გასათვალისწინებელია არა მხოლოდ  ფაქტორი,  თუ როგორ გამოკვეთს ის უშუალოდ  ნამუშევარს (ან პირიქით), არამედ ისიც, თუ  როგორ ჩაეწერება ის თქვენი ოთახის ინტერიერში, როგორ მოუხდება  ნახატისთვის წინასწარ შერჩეულ ადგილს.

საინტერესოა, რომ ნახატის ჩარჩოთი „შემკობა“ შუა საუკუნეებში ერთგვარ მოდას წარმოადგენდა.  ისტორიულად,  ჩარჩო,  ზოგადი მოდის პრინციპების მიხედვით იცვლებოდა, რენესანსის ეპოქაში კი  მოჩარჩოების ტენდენცია  პიკს აღწევს- მას უხამებდნენ ოთახის ინტერიერის თითქმის ყველა დეტალს: ავეჯს, სარკეს, ფანჯრებისა და კარების ჩარჩოებს,  ბუხარს და სხვა..  რენესანსის შემდეგ კი მოჩარჩოება  თანდათან თითქოს კარგავს აქტუალობას.

ნიშნავს თუ არა ყოველივე ეს, რომ ჩარჩო არა ნამუშევრის ნაწილი, არამედ დამოუკიდებელი ხელოვნების ნიმუშია? დიახ, გარკვეულწილად ნიშნავს, რადგან ჩარჩოს აქვს თავის, დამოუკიდებელი სტილი, საკუთარი მახასიათებლები  და ის შეიძლება  ძალზე ძვირფასი იყოს.

ასეა თუ ისე, ჩარჩო ყოველთვის იყო და იქნება შესარჩევ-ასარჩევ-მოსარგები და აი რამოდენიმე რჩევა, რაც ჩარჩოს შერჩევაში შეიძლება დაგეხმაროთ:

პირველ რიგში კარგად დააკვირდით და განსაზღვრეთ ჭირდება თუ არა ნახატს ჩარჩო, იქნებ მის გარეშე უკეთესია?

თუ კი მიანც გადაწყვეტთ, რომ ჩარჩო საჭიროა, აუცილებლად გაითვალისწინეთ , თუ რა ტექნიკითაა შესრულებულ ნამუშევარი და მხოლოდ ამის შემდეგ მიიღეთ პირველადი გადაწყვეტილება-კლასიკური ჩარჩო უფრო მოუხდება თუ თანამედროვე.

გასათვალისწინებელია ასევე ზომები და ადგილი, სადაც აღნიშნული ნახატის ჩამოკიდებას აპირებთ. შესაძლებელია ნახატი ძალიან მცირე ზომის იყოს,  ჩარჩო კი დიდი ზომის შეუხამოთ, რაც უფრო მონუმენტურს და შესამჩნევს გახდის ნამუშევარს, ამის შემდეგ კი შეიძლება მისი განთავსების ადგილიც შეცვალოთ.

აუცილებლად მიიღეთ მხედველობაში  ნამუშევრის ფერთა გამა, რომელიც შეიძლება „ჩაქრეს“ ან პირიქით, გამოიკვეთოს სწორად შერჩეული ჩარჩოს შემთხვევაში.

და ბოლოს-ფასი. ზოგი ფიქრობს, რომ ჩარჩო ნახატზე ძვირადღირებული არ უნდა იყოს, რაც სულაც არ დგას ჭეშმარიტებისგან შორს, ზოგი კი პირიქით, საყვარელი ნამუშევრისთვის ყველაზე საუკეთესო მოჩარჩოებას ირჩევს, რაც ასევე მისაღები და გასაგებია, ბევრ ჩვენგანს მოეპოვება სახლში არც თუ ისე ძვირფასი ბეჭედი, რომელიც ძვირადღირებულ,  ბებიის დანატოვარ ანტიკვარულ ზარდახშაში ინახება…

კალათა

Back to Top