ავტორი: დავით ბაძაღუა

დავით ბაძაღუა
(David Gua)

მხატვარი აფხაზეთიდან… თავად მისი ხელმოწერაც, GUA ხომ აფხაზურად “გულს” ნიშნავს..
საქართველოს მხატვარათა კავშირის და გამგეობის წევრი, იყო ასევე აფხაზეთის ავტონომიური რესპუბლიკის მხატვართა კავშირის თავმჯდომარე, გიორგი შარვაშიძის პრემიის ლაურეატი, თბილისის სახელმწიფო სამხატვრო აკადემიის პედაგოგი ინტერიერსა და ექსტერიერში სამრეწველო დიზაინის კათედრაზე. დაამთავრა გალის სამხატვრო სკოლა, შემდეგ კი აპოლონ ქუთათელაძის სახელობის სამხატვრო აკადემია. ჰქონდა არაერთი პერსონალური და ჯგუფური გამოფენა, ხშირადაა მონაწილე და ინიციატორი სხვადასხვა პროექტის ფარგლებში განხორციელებული გამოფენებისა. 2012 წელს დავით ბაძაღუამ ერთ-ერთი ასეთი პროექტის ფარგლებში შექმნა აფხაზეთის ტერიტორიაზე არსებული ქართული კულტურული მემკვიდრეობის 22-მდე ძეგლის ფერწერული და გრაფიკული სურათების ძალიან საინტერესო სერია, რაც მოგვიანებით გამოიცა, როგორც კალენდარი-კატალოგი, აღნიშნულ პროექტს დიდი მნიშვნელობა მიენიჭა აფხაზეთის ისტორიულ-კულტურული მემკვიდრეობის ძეგლების გაცოცხლების, ქართული კულტურის ძეგლების პოპულარიზაციის და ზოგადად საქართველოს რეგიონებში კულტურული ცხოვრების გააქტიურება-განვითარების კუთხით.
როგორც თვითონ ამბობს- მხატვრისთვის ერთი ცხოვრება საკმარის არასდროსაა, ხშირად მისი ნახატი ქვეცნოებირის მიერ იქმნება და მხოლოდ ნამუშევრის დასრულების შემდგომ ხედავს იმას, რაც შექმნა. ქმნის ერთმანეთისგან განსხვავებულს, მასში ბევრი მხატვარი ერთდორულად თანაცხოვრობს, მაგრამ არცერთი მათაგნი არ არის დეპრესიული და მძიმე. მის ნამუშევრებში ერთნაირად ვხვდებით აბსტრაგციასა და კონკრეტიკას, რაც არ უნდა სევდიანი იყოს სიუჟეტი, დავითი მას მდიდარი ფერთა გამით ისე “ნიღბავს” რომ არასდროსაა მნახველისთვის სევდის და სიმძიმის მომგვრელი, თუმცა მის ნამუშევრებში ხშირად ვხვდებით სიმბოლურ, ალეგორიულ ელემენტებს, რაც მის მიერ, აფხაზეთის დაკარგვით განცდილ ტკივილთანაა ასოცირებული.
პანდემიის შემდგომ, სრულიად საქართველოს პატრიარქის კურთხევით, დავითი მსოფლიოს 100 ცნობილ მხატვართან ერთად ემზადება შექმნას ნამუშევარი “ჩვენ ერთნი ვართ”, რომელიც აფხაზეთისთვის მიძღვნილი ყველაზე მასშტაბური ფერწერული ნაწარმოები იქნება.
დავით ბაძაღუას ნამუშევრები დაცულია  მსოფლიოს სხვადასხვა ქვეყნის კოლექციებში, ასევე გალერეეებსა და მუზეუმებში.